Karfan er tóm
"Hvernig er best að þjálfa hundinn?“ – Grunnatriði í þjálfun og hegðun hunda
Að þjálfa hundinn þinn er mikilvægur hluti af því að eiga dýr. Góð þjálfun stuðlar að jákvæðri hegðun, eykur öryggi og styrkir samband eiganda og hunds sem gerir samvistina ánægjulega. Hér eru grunnatriði í þjálfun og hegðun hunda sem geta hjálpað þér að þjálfa hundinn þinn á árangursríkan hátt með lítilli fyrirhöfn!
💡 Vissir þú að?
Hundar geta lært yfir 100 orð og skipanir? Greindustu hundarnir geta náð að læra yfir 200 orð! Að kenna hundi krefst sjálfsaga í að sinna hundinum, vera samkvæmur sjálfum sér og skilja hvernig hundurinn lærir!
Hvernig læra hundar?
Styrking og endurtekning
Hundar læra gegnum styrkingu og endurtekningu. Hljómar einfalt ekki satt? En það er þess virði að veita þessum tveimur hugtökum athygli og skilja hugtökin vel til þess að einfalda þér alla þjálfun á hundinum um komandi ár.
Eins er mikilvægt að skilja hvernig hundar skynja umhverfi sitt og hvernig þeir nota líkamstjáningu sína. Að læra jákvæð merki hundsins sem og streitumerki hans hjálpar þér að þjálfa hundinn á skilvirkan hátt.
Hundur á hlýðninámskeiði
Styrking: Aðferð við þjálfun þar sem góð hegðun er verðlaunuð, t.d. með leik, hrósi eða litlum nammibita til að auka líkur á að hundurinn endurtaki hegðunina.
Endurtekning: Að æfa sömu hegðun aftur og aftur til að styrkja lærdómsferlið og tryggja að hundurinn muni skipanir og viðbrögð í mismunandi aðstæðum. Athugið - endurtaka þarf æfingarnar á mismunandi stöðum og undir mismunandi kringumstæðum!
Fjórir flokkar hegðunar
Við teljum mikilvægt að fræða hundaeigendur um hina fjóru flokka hegðunar sem felast í mismunandi leiðum til þess að hundurinn skilji til hvers er ætlast af honum. Notast er við orðin "jákvætt" og "neikvætt" eftir því hvort eitthvað er veitt eða eitthvað er tekið frá. Vissir flokkar stuðla að hraðari og uppbyggilegri lærdóm eins og t.d. jákvæð styrking og neikvæð refsing.
Jákvæð styrking: Þegar verðlaun eru notuð til að auka líkur á að hegðun endurtaki sig, t.d. hundur fær nammi fyrir að sitja.
Neikvæð styrking: Þegar óþægileg áreiti eru fjarlægð til að styrkja hegðun, t.d. að losa um taum þegar hundur hættir að toga.
Jákvæð refsing: Þegar einhverju óþægilegu er bætt við til að draga úr hegðun, t.d. hávaði til að stoppa gelt.
Neikvæð refsing: Þegar eitthvað jákvætt er tekið í burtu til að draga úr hegðun, t.d. að snúa sér í burtu þegar hundur hoppar upp.
Samkvæmni og þolinmæði
Til þess að ná árangri í þjálfun og stuðla að vellíðan hundsins er mikilvægt að vera samkvæmur sjálfum sér og sýna þolinmæði. Hundar læra með endurtekningum og því er mikilvægt að sýna stöðugleika við þjálfun hundsins. Notaðu sömu skipanir og umbunarkerfi til þess að forðast rugling.
Þolinmæði er lykilatriði!
Sumar æfingar taka hreinlega lengri tíma og krefjast fleiri endurtekninga en aðrar.
Fjórar grunnskipanir
Að byrja rólega og leggja góðan grunn með einföldum skipunum, eins og sestu, slaka, innkall og bíða, hjálpar hundinum að skilja væntingar og læra á jákvæðan hátt. Með því að einblína á grunnskipanirnar fyrst getur hundurinn byggt sjálfstraust sitt smám saman, sem auðveldar frekari þjálfun síðar meir. Auk þess eykur þessi nálgun líkurnar á árangri þar sem hundurinn fær að læra í skrefum, án þess að upplifa streitu eða óöryggi.
„Sitja“ – Hjálpar til við að stjórna spennu og hegðun.
„Slökun“ – Gott fyrir slökun og stjórnun.
„Koma“ – Eykur öryggi og tryggir að hundurinn hlýði þegar hann er laus.
„Stopp“ eða „Bíða“ – Hjálpar til við að stjórna hundinum í mismunandi aðstæðum.
Traustur grunnur stuðlar þannig að betri hegðun, meiri hlýðni og ánægjulegra sambandi til lengri tíma.
Umhverfisþjálfun og félagsmótun
Að venja hundinn við fólk, aðra hunda og fjölbreyttar aðstæður er lykilatriði til að stuðla að sjálfsöryggi og góðri hegðun. Þegar rétt er staðið að félagsmótun hjálpar það hundinum að læra að takast á við nýjar upplifanir á jákvæðan og uppbyggilegan hátt sem getur fyrirbyggt algeng hegðunarvandamál síðar meir.
Það er best að hefja félagsmótun snemma, helst á meðan hvolpurinn er á viðkvæmu mótunarstigi, sem er yfirleitt á aldrinum 3 til 14 vikna. Á þessu tímabili er hvolpurinn sérstaklega móttækilegur fyrir nýrri reynslu og því mikilvægt að kynna hann fyrir fjölbreyttu umhverfi, mismunandi gerðum fólks, öðrum dýrum og ólíkum hljóðum og lykt. Mikilvægt er að nálgast þessar aðstæður á jákvæðan hátt með hrósi, umbun og þolinmæði til að tryggja að þær skilji eftir sig góða upplifun. Umhverfisþjálfun á sér svo stað allt hans líf og er mikilvægt að hlúa að þeim þætti þjálfunar.
Að taka hundinn með í stutta göngutúra í fjölbreyttu umhverfi, heimsækja stillta hunda eða leyfa honum að hitta vini og vandamenn getur verið gagnlegt. Mikilvægt er þó að gæta þess að yfirkeyra ekki hundinn með of miklum áreitum í einu, heldur auka áskoranirnar smám saman. Skipulögð félagsmótun með öðrum yfirveguðum hundum getur einnig hjálpað til við að þróa jákvæða hegðun og samskiptahæfileika.
Umhverfisþjálfun felur einnig í sér að kenna hundinum að vera rólegur í nýjum aðstæðum, til dæmis á fjölmennum stöðum eða í bílferðum. Þetta eykur bæði öryggi hans og eigandans í daglegu lífi. Með því að leggja áherslu á jákvæða upplifun og taka lítil skref í þjálfuninni í einu tryggir þú að hundurinn æfi sig í jákvæðri hegðun gagnvart nýjum aðstæðum. Góð umhverfisþjálfun og félagsmótun gerir hundinum kleift að lifa innihaldsríku lífi og auðveldar bæði þjálfun og samskipti til lengri tíma.
Leikir og andleg örvun
Hundar þurfa ekki aðeins reglulega líkamlega hreyfingu heldur einnig fjölbreytta andlega örvun til að vera ánægðir og vel á sig komnir. Rétt eins og líkamleg þjálfun styrkir vöðva og líkamlega heilsu, hjálpar andleg örvun til við að auka greind, einbeitingu og almenna líðan hundsins. Leikir, þrautir og lyktarþjálfun eru frábær leið til að halda huga hans virkum og koma í veg fyrir óæskilega hegðun, svo sem skemmdir innan heimilisins, mikið gelt o.s.frv.
Leikir eins og að fela uppáhaldsleikfang eða toga í reipi geta verið bæði skemmtilegir og krefjandi. Slíkir leikir styrkja ekki aðeins sambandið milli hunds og eiganda heldur hjálpa einnig til við að þjálfa hlýðni og æfa stöðugleika. Þrautir eða leikföng sem fela í sér að hundurinn þurfi að leysa verkefni til að fá nammi, örva lausnargetu hans og þjálfa þolinmæði og úthald. Boltaleikir geta verið skemmtilegir en geta á sama tíma æst hund enn frekar upp sem hefur ekki lært góða stjórn á hegðun sinni.
Lyktarþjálfun er sérstaklega gagnleg fyrir hunda þar sem hún virkjar náttúrulega hæfileika þeirra til að nota lyktarskyn sitt. Leikir eins og að fela nammi í húsinu eða úti við og leyfa hundinum að finna það með nefinu eru frábær leið til að þreyta hann andlega. Slík þjálfun getur einnig hjálpað hundum að einbeita sér og draga úr streitu.
Til að halda andlegri örvun áhugaverðri er gott að skipta reglulega um leiki og þrautir. Að læra nýjar skipanir eða æfingar er einnig hluti af andlegri þjálfun sem styrkir sjálfstraust hundsins og gerir daglegt líf auðveldara. Með því að bjóða upp á fjölbreytt úrval af verkefnum tryggir þú að hundurinn fái útrás fyrir greind sína og eðlishvatir, sem stuðlar að betri hegðun og aukinni vellíðan.
Leitaðu aðstoðar ef þörf er á
Ef þú átt í erfiðleikum með þjálfun getur verið gagnlegt að leita til reynds hundaþjálfara. Sérstaklega ef hegðunarvandamál koma upp sem erfitt er að stjórna, því fyrr sem gripið er inn í óæskilega hægðun því fyrr er hægt að lagfæra hana.
Hundur í sporaþjálfun hjá Alberti hundaþjálfara
Samantekt
Með þrautseigju, jákvæðni og samkvæmni geturðu byggt upp sterkt samband við hundinn þinn og hjálpað honum að læra góðar venjur. Þjálfun á að vera skemmtileg fyrir bæði hund og eiganda, svo njóttu ferlisins og verðlaunaðu framfarir!
Greinin er unnin í samvinnu við Albert hundaþjálfara Dýrheima.
THEODÓRA RÓBERTSDÓTTIR
Theodóra er dýrahjúkrunarfræðingur að mennt og er með Award of merit í næringu smádýra frá BSAVA. Ásamt því er áhugasviðið að fyrirbyggja vandamál og sjúkdóma gegnum umönnun. Theodóra starfar hjá Dýrheimum við ráðgjöf tengda heilsu og næringu í Heilsutékki Dýrheima auk þess að halda fyrirlestra, einkatíma fyrir sýningar og sýnendanámskeið.