Karfan er tóm
Hvað fer ofan í hundinn þinn?
Hvenær er gott, gott?
Við gefum mörg hundunum okkar einhvers konar verðlaun í formi nagbeina, nammibita við þjálfun eða jafnvel aukabita frá matardiskum mannfólksins. Það er okkur frekar eðlislægt að yfirfæra matarást okkar yfir á hundinn og jafnvel rík þörf fyrir að deila slíku matarkyns með hundunum, án þess þó að hugsa til þess að mögulega var þessum aukabita ofaukið.
1. Næring hunda
Markmið næringar er að stuðla að heilbrigðum uppvexti og viðhaldi líkama hundsins. Auk þess stuðla að nægilegri orku, að næra líkamann vel og fyrirbyggja sjúkdóma og næringartengd vandamál og ekki síst stuðla að góðri umönnun hundsins.
Til þess að útbúa fullnægjandi næringu fyrir hundinn þarf að setja saman um 50 næringarefni á réttan hátt, í réttum hlutföllum hvort við annað. Þegar við veljum fóður í næringarlegu jafnvægi leggjum við ríka áherslu á næringarefnin sjálf og hlutföll þeirra.
Viltu læra meira um hvernig næring virkar? - Sjá HÉR.
2. Hvolpar
Gegndræpi þarma er meira í hvolpum og stærri tegundum heldur en fullvaxta hundum og smáhundum, sem þýðir að þarmarnir hleypa meira í gegnum sig við vinnslu næringarefna. Því er mikilvægt að hafa í huga allt sem fer aukalega ofan í meltingarveg hvolpa. Til að mynda getur verið erfiðara fyrir meltingarveg hvolpa að vinna úr nagbeinum, verðlaunum og aukabitum. Vegna þessa geta hvolpar verið líklegri til þess að þróa með sér einkenni húð- og meltingarfæravandamála.
3. Nagbein og aukabitar
Gífurlegt úrval er af alls kyns nagbeinum og aukabitum fyrir hunda í dag, nokkur góð ráð:
- Veldu mild nagbein fyrir hvolpa og unghunda - helst ávallt eins bein.
- Ekki hafa úrval af alls kyns nagbeinum, slíkt getur verið mjög ertandi fyrir viðkvæman meltingarveg.
- Veldu nagbein með próteingjafa sem hvolpurinn þekkir og taktu meðvitaða ákvörðun hversu oft slík bein eru í boði.
- Takmarkaðu úrval af alls konar nýju, notum fóðrið við almenna þjálfun og nammibita við sérstök tilefni.
- Gott er að bjóða t.d. frysta gúrku, gulrætur eða slíkt til þess að naga.
- Að velja blautmat úr sömu línu og fóður hundsins til þess að nota í afþreyingarleikföng.
Gott að hafa í huga: því einfaldara því betra.
4. Önnur afþreying?
Við vitum að gjöf á nagbeinum getur hjálpað til fyrir orkumikla hvolpa og hunda að þreytast. Hinsvegar eru til ótal önnur ráð sem hafa ekki jafn mikil áhrif á meltingu og heilsu þeirra:
- Notaðu leikföng meira í þjálfun.
- Prófaðu að setja blautmat hundsins í sleikimottu og frysta.
- Prófaðu að bleyta þurrmatinn og setja í nagdót og frysta.
- Leyfðu hundinum að leita af matnum sínum í þefmottu eða úti á grasi.
Eru komin vandamál?
Algeng vandamál eru kláði, einkenni í húð, meltingareinkenni eins og t.d. niðurgangur. Ef slík einkenni gera vart við sig og við getum tengt þau við gjöf á nýjum nagbeinum eða aukabitum er fyrsta ráð ÁVALLT að taka allt slíkt út úr rútínu hvolpsins/hundsins strax. Sjáum við ekki mun á einkennum eða líðan hvolpsins er næsta skref að kanna nánar orsök einkenna. Fóðurskipti eiga að vera síðasta val óháð því hvaða fóður er gefið, þar sem slík breyting telst stórtæk fyrir jafnvægi í meltingarvegi hvolpa. Gott er að hafa í huga að allt matarkyns inniheldur mismikið af hitaeiningum og því getur það einnig leitt til of mikillar þyngdaraukningar.
ATH! Mikilvægt er að hafa samband við dýralækninn þinn sjáir þú alvarleg einkenni í húð eða meltingarveg hvolpsins/hundsins eða ef hundur sýnir slappleika, almennt lystarleysi o.sfrv.
THEODÓRA RÓBERTSDÓTTIR
Theodóra er dýrahjúkrunarfræðingur að mennt og er með Award of merit í næringu smádýra frá BSAVA. Ásamt því er áhugasviðið að fyrirbyggja vandamál og sjúkdóma gegnum umönnun. Theodóra starfar hjá Dýrheimum við ráðgjöf tengda heilsu og næringu í Heilsutékki Dýrheima auk þess að halda fyrirlestra, einkatíma fyrir sýningar og sýnendanámskeið.