Karfan er tóm
Sumarráð fyrir dýrin! Getur sólin orðið hættuleg dýrunum?
Getur hitinn verið hættulegur fyrir gæludýrið þitt?
Sumarið er tími útivistar, birtu og samveru en það kallar einnig á aukna aðgát fyrir alla sem bera ábyrgð á velferð hunda og katta. Hlýtt veðurfar getur haft alvarleg áhrif á líkamshita og öndun dýra, sérstaklega hunda sem fylgja okkur út í göngutúra, í ferðalög og í sumarævintýrin.
"Hundar og kettir hafa ekki sömu getu til þess að svitna og við og eru því viðkvæmari fyrir hita"
💡 Vissir þú að?
- Dýr kæla sig aðallega með munnöndun (hljóðlaus andardráttur með opnum munni). Hitastig yfir 20°C, sérstaklega í beinu sólarljósi, getur orðið hættulegt.
- Þegar hitastig er 25°C getur malbikið verið yfir 50°C. Prófaðu með lófanum – ef þú getur ekki haldið hendinni í 5 sekúndur er það of heitt fyrir loppur!
- Hitastig inni í kyrrstæðum bíl í sól getur farið yfir 40°C á innan við 10 mínútum – jafnvel með glugga opna.
"Umhyggja og aðgát eru lykillinn að góðri sumarsamveru 🐶🐱💛"
Við höfum öll gaman af sól og sumri og með smá skipulagi og virðingu fyrir mörkum gæludýra okkar, getum við átt öruggar og skemmtilegar stundir saman.
🌡️ Hitastig og líkamshitastýring dýra
Gæludýr, sérstaklega hundar og kettir, hafa ekki sömu hæfni til að svitna og kæla sig eins og menn. Þau svitna aðallega í gegnum loppurnar og kæla sig með því að anda hratt með opnum munni. Þetta er sérstaklega mikilvægt að hafa í huga þegar hitastigið fer yfir 20°C, því þá getur líkamshiti þeirra hækkað hratt, jafnvel í skugga. Hundar með stutt nef, þykkan feld eða hjarta- og öndunarfærasjúkdóma eru sérstaklega viðkvæmir.
💦 Vatnsinntaka
Gakktu úr skugga um að dýrið hafi alltaf aðgang að fersku vatni og skugga – hvort sem það er í garðinum, útilegu eða á ferðalagi. Þú getur útbúið kælimottur, sett blaut handklæði í skugga eða látið vatn renna í skál í göngutúr. Fyrir ketti sem eru inni í heitum húsum getur verið gagnlegt að hleypa þeim í svalari herbergi og opna glugga (með öryggi í huga).
Fyrir þau dýr sem eru slappari við vatnsdrykkju eða hafa minni matarlyst vegna hita er upplagt að nota blautfóður til þess að setja út í vatn og út á fóðrið til þess að stuðla að nægilegri vatnsinntöku.
⚠️ Einkenni ofhitnunar og hitaslags
Ofhitnun getur komið hratt og einkennin eru stundum lúmsk. Algengustu merki eru:
Hröð munnöndun
Slappleiki eða doði
Uppköst
Óstöðugleiki
Rauðar eða fölar slímhúðir
Hraður hjartsláttur
⚠ Í alvarlegum tilfellum getur dýrið misst meðvitund. Ef þú hefur grun um hitaslag skaltu strax færa dýrið í skugga, bleyta loppurnar með volgu vatni og hafa samband við dýralækni.
Sumarið á að vera skemmtilegur tími. Með smá skipulagi og athygli getum við tryggt að þau njóti sumarsins á öruggan hátt, án óþarfa áhættu.
Umhyggja og aðgát eru lykillinn að góðri sumarsamveru 🐶🐱
THEODÓRA RÓBERTSDÓTTIR
Theodóra er dýrahjúkrunarfræðingur að mennt og er með Award of merit í næringu smádýra frá BSAVA. Ásamt því er áhugasviðið að fyrirbyggja vandamál og sjúkdóma gegnum umönnun. Theodóra starfar hjá Dýrheimum við ráðgjöf tengda heilsu og næringu í Heilsutékki auk umsjónar fræðsluseturs Dýrheima.
